నారాయణ కవచం

(విశ్వరూప ఉవాచ)
ధౌతాంగ్ఘ్రిపాణిరాచమ్య సపవిత్ర ఉదఙ్ముఖః ।
కృతస్వాంగకరణ్యాసో మంత్రాభ్యాం వాగ్యతః శుచిః ॥ ౦౪ ॥

నారాయణమయం వర్మ సన్నహ్యేత్ భయ ఆగతే ।
పాదయోర్జానునోరూర్వోః ఉదరే హృద్యథోరసి ॥ ౦౫ ॥

ముఖే శిరస్యానుపూర్వ్యాద్ ఓంకారాదీని విన్యసేత్ ।
ఓం నమో నారాయణాయేతి విపర్యయమథాపి వా ॥ ౦౬ ॥

కరన్యాసం తతః కుర్యాత్ ద్వాదశాక్షర విద్యయా ।
ప్రణవాదియకారాంతం అంగుళ్యంగుష్ఠ పర్వసు ॥ ౦౭ ॥

న్యసేద్ధృదయ ఓంకారం వికారం అనుమూర్ధని ।
షకారంతు భ్రువోర్మధ్యే ణకారం శిఖయా దిశేత్ ॥ ౦౮ ॥

వేకారం నేత్రయోర్యుంజ్యాత్ నకారం సర్వసంధిషు ।
మకారం అస్త్రం ఉద్దిశ్య మంత్రమూర్తిర్భవేద్ బుధః ॥ ౦౯ ॥

సవిసర్గం ఫడంతం తత్ సర్వదిక్షు వినిర్దిశేత్ ।
ఓం విష్ణవే నమః ఇతి ॥ ౧౦ ॥

ఆత్మానం పరమం ధ్యాయేత్ ధ్యేయం షట్ శక్తిభిర్యుతమ్‌ ।
విద్యాతేజస్తపోమూర్తిమ్ ఇమం మంత్రం ఉదాహరేత్ ॥ ౧౧ ॥

ఓం హరిః విధద్యాత్ మమ సర్వరక్షాం న్యస్తాంఘ్రి పద్మః పతగేంద్రపృష్ఠే ।
దరారి చర్మాసి గదేషు చాప పాశాన్ దధానోఽష్ట గుణోఽష్టబాహుః ॥ ౧౨ ॥

జలేషు మాం రక్షతు మత్స్యమూర్తిః యాదోగణేభ్యో వరుణస్య పాశాత్ ।
స్థలేషు మాయావటు వామనోఽవ్యాత్ త్రివిక్రమః ఖేఽఅవతు విశ్వరూపః ॥ ౧౩ ॥

దుర్గేష్వటవ్యాజిముఖాదిషు ప్రభుః పాయాన్ నృసింహోఽసురయూథపారిః ।
విముంచతో యస్య మహాట్టహాసం దిశో వినేదుర్న్యపతంశ్చ గర్భాః ॥ ౧౪ ॥

రక్షత్వసౌ మాధ్వని యజ్ఞకల్పః స్వదంష్ట్రయోన్నీతధరో వరాహః ।
రామోఽద్రికూటేష్వథ విప్రవాసే సలక్ష్మణోవ్యాత్ భరతాగ్రజోఽస్మాన్ ॥ ౧౫ ॥

మాం ఉగ్రధర్మాద్ అఖిలాత్ ప్రమాదాత్ నారాయణః పాతు నరశ్చ హాసాత్ ।
దత్తస్తథా యోగాద్ అథ యోగనాథః పాయాద్ గుణేశః కపిలః కర్మబంధాత్ ॥ ౧౬ ॥

సనత్కుమారోవతు కామదేవాత్ హయాననో మాం పథి దేవహేలనాత్ ।
దేవర్షివర్యః పురుషార్చనాంతరాత్ కూర్మో హరిర్మాం నిరయాద్ అశేషాత్ ॥ ౧౭ ॥

ధన్వంతరిః భగవాన్ పాత్వపత్యాత్ ద్వంద్వాద్ భయాద్ ఋషభో నిర్జితాత్మా ।
యజ్ఞశ్చ లోకాద్ అవతాజ్జనాంతాత్ బలో గణాత్ క్రోధవశాద్ అహీంద్రః ॥ ౧౮ ॥

ద్వైపాయనో భగవాన్ అప్రబోధాత్ బుద్ధస్తు పాఖండగణాత్ ప్రమాదాత్ ।
కల్కిః కలేః కాలమలాత్ ప్రపాతు ధర్మావనాయోరు కృతావతారః ॥ ౧౯ ॥

మాం కేశవో గదయా ప్రాతరవ్యాత్ గోవింద ఆసంగవం ఆత్తవేణుః ।
నారాయణః ప్రాహ్ణ ఉదాత్తశక్తిః మధ్యందినే విష్ణురరీంద్రపాణిః ॥ ౨౦ ॥

దేవోఽపరాహ్నే మధుహోగ్రధన్వా సాయం త్రిధామావతు మాధవో మాం ।
దోషే హృషీకేశ ఉతార్ధరాత్రే నిశీథ ఏకోఽవతు పద్మనాభః ॥ ౨౧ ॥

శ్రీవత్సధామాఽపరరాత్ర ఈశః ప్రత్యూష ఈశోఽసిధరో జనార్దనః ।
దామోదరోఽవ్యాదనుసన్ధ్యం ప్రభాతే విశ్వేశ్వరో భగవాన్ కాలమూర్తిః ॥ ౨౨ ॥

చక్రం యుగాంతానల తిగ్మనేమి భ్రమత్ సమంతాత్ భగవత్ ప్రయుక్తమ్ ।
దన్దగ్ధి దన్దగ్ధ్యరిసైన్యమాశు కక్షం యథా వాతసఖో హుతాశః ॥ ౨౩ ॥

గదేశని స్పర్శన విస్ఫులింగే నిష్పిండ నిష్పిండ్యజిత ప్రియాసి ।
కూష్మాండ వైనాయక యక్ష రక్షో భూత గ్రహాంశ్చూర్ణయ చూర్ణయారిన్ ॥ ౨౪ ॥

త్వం యాతుధాన ప్రమథ ప్రేతమాతృ పిశాచ విప్రగ్రహ ఘోరదృష్టీన్ ।
దరేంద్ర విద్రావయ కృష్ణ పూరితో భీమస్వనోరేర్ హృదయాని కంపయన్ ॥ ౨౫ ॥

త్వం తిగ్మధారాసి వరారిసైన్యం ఈశప్రయుక్తో మమ ఛింది ఛింది ।
చక్షూంషి చర్మణ్ఛథ చంద్రఛాదయ ద్విషాం అఘోనాం హర పాపచక్షుషామ్ ॥ ౨౬ ॥

యన్నోభయం గ్రహేభ్యోఽభూత్ కేతుభ్యో నృభ్య ఏవ చ ।
సరిసృపేభ్యో దంష్ట్రిభ్యో భూతేభ్యోఽంహోభ్య ఏవ వా ॥ ౨౭ ॥

సర్వాణ్యేతాని భగవన్నామ రూపాస్త్ర కీర్తనాత్ ।
ప్రయాంతు సంక్షయం సద్యో యే నః శ్రేయః ప్రతీపకాః ॥ ౨౮ ॥

గరుడో భగవాన్ స్తోత్ర స్తోభశ్ఛందోమయః ప్రభుః ।
రక్షత్వశేష కృచ్ఛ్రేభ్యో విశ్వక్సేనః స్వనామభిః ॥ ౨౯ ॥

సర్వాపద్భ్యో హరేర్నామ రూప యానాయుధాని నః ।
బుద్ధీంద్రియ మనః ప్రాణాన్ పాంతు పార్షద భూషణాః ॥ ౩౦ ॥

యథా హి భగవానేవ వస్తుతః సదసచ్చ యత్ ।
సత్యేనానేన నః సర్వే యాంతు నాశం ఉపద్రవాః ॥ ౩౧ ॥

యథైకాత్మ్యానుభావానాం వికల్పరహితః స్వయం ।
భూషణాయుధ లింగాఖ్యా ధత్తే శక్తీః స్వమాయయా ॥ ౩౨ ॥ 

తేనైవ సత్యమానేన సర్వజ్ఞో భగవాన్ హరిః ।
పాతు సర్వైః స్వరూపైర్నః సదా సర్వత్ర సర్వగః ॥ ౩౩ ॥

విదిక్షు దిక్షూర్ధ్వమధః సమంతాత్ అంతర్బహిర్భగవాన్ నారసింహః ।
ప్రహాపయన్ లోకభయం స్వనేన స్వతేజసా గ్రస్త సమస్తతేజాః ॥ ౩౪ ॥

మఘవన్నిదం ఆఖ్యాతం వర్మ నారాయణాత్మకమ్ ।
విజేష్యస్యంజసా యేన దంషితోఽసురయూథపాన్ ॥ ౩౫ ॥

ఏతద్ధారయమానస్తు యం యం పశ్యతి చక్షుషా ।
పాదా వా సంస్పృశేత్ సద్యః సాధ్వసాత్ స విముచ్యతే ॥ ౩౬ ॥

న కుతశ్చిద్భయం తస్య విద్యాం ధారయతో భవేత్ ।
రాజదస్యుగ్రహాదిభ్యో వ్యాఘ్రాదిభ్యశ్చ కర్హిచిత్ ॥ ౩౭ ॥

ఇమాం విద్యాం పురా కశ్చిత్ కౌశికో ధారయన్ ద్విజః ।
యోగధారణయా స్వాంగం జహౌ స మరుధన్వని ॥ ౩౮ ॥

తస్యోపరి విమానేన గంధర్వపతిరేకదా ।
యయౌ చిత్రరథః స్త్రీభిర్వృతః యత్ర ద్విజక్షయః ॥ ౩౯ ॥

గగనాన్యపతత్ సద్యః సవిమానో హ్యవాక్శిరాః।
స వాలఖిల్యవచనాత్ అస్థీన్యాదాయ విస్మితః ॥ ౪౦ ॥

ప్రాస్య ప్రాచీ సరస్వత్యాం స్నాత్వా ధామ స్వమన్వగాత్ ॥ ౪౧ ॥

(శ్రీశుక ఉవాచ)
య ఇదం శృణుయాత్ కాలే యో ధారయతి చాదృతః ।
తం నమస్యంతి భూతాని ముచ్యతే సర్వతో భయాత్ ॥ ౪౨ ॥

ఏతాం విద్యాం అధిగతో విశ్వరూపాత్ శతక్రతుః ।
త్రైలోక్యలక్ష్మీం బుభుజే వినిర్జిత్య మృధేఽసురాన్ ॥ ౪౩ ॥

ఇతి శ్రీమద్భాగవతే మహాపురాణే పరం హంస్యాం సంహితాయాం
షష్ఠ స్కంధే నారాయణ వర్మకథనం నామ అష్టమోఽధ్యాయః ॥