శ్రీ ఆదిత్య హృదయం

ఓం నమో భగవతే ఆదిత్యాయ

తతో యుద్ధ పరిశ్రాంతం సమరే చింతయా స్థితమ్‌ ।
రావణం చాఽగ్రతో దృష్ట్వా యుద్ధాయ సముపస్థితమ్‌ ॥ ౦౧ ॥

దైవతైశ్చ సమాగమ్య ద్రష్టుమభ్యాగతో రణమ్ ।
ఉపాగమ్యాఽబ్రవీద్రామం అగస్త్యో భగవాన్ ఋషిః ॥ ౦౨ ॥

రామ రామ మహాబాహో శృణు గుహ్యం సనాతనమ్ ।
యేన సర్వానరీన్ వత్స సమరే విజయిష్యసి ॥ ౦౩ ॥

ఆదిత్య హృదయం పుణ్యం సర్వశత్రువినాశనమ్ ।
జయాఽవహం జపేన్నిత్యమ్‌ అక్షయం పరమం శివమ్ ॥ ౦౪ ॥

సర్వమంగళమాంగల్యం సర్వపాపప్రణాశనమ్ ।
చింతాశోకప్రశమనం ఆయుర్వర్ధనముత్తమమ్ ॥ ౦౫ ॥

రశ్మిమంతం సముద్యంతం దేవాసుర నమస్కృతమ్ ।
పూజయస్వ వివస్వంతం భాస్కరం భువనేశ్వరమ్ ॥ ౦౬ ॥

సర్వదేవాత్మకో హ్యేష తేజస్వీ రశ్మిభావనః ।
ఏష దేవాసురగణాన్ లోకాన్ పాతి గభస్తిభిః ॥ ౦౭ ॥

ఏష బ్రహ్మా చ విష్ణుశ్చ శివః స్కందః ప్రజాపతిః ।
మహేంద్రో ధనదః కాలో యమః సోమో హ్యపాంపతిః ॥ ౦౮ ॥

పితరో వసవః సాధ్యాః హ్యశ్వినౌ మరుతో మనుః ।
వాయురగ్నిః ప్రజాప్రాణః ఋతుకర్తా ప్రభాకరః ॥ ౦౯ ॥

ఆదిత్యః సవితా సూర్యః ఖగః పూషా గభస్తిమాన్ ।
సువర్ణసదృశో భానుః హిరణ్యరేతా దివాకరః ॥ ౧౦ ॥

హరిదశ్వః సహస్రార్చిః సప్తసప్తిర్మరీచిమాన్ ।
తిమిరోన్మథనః శంభుః త్వష్టా మార్తండ అంశుమాన్ ॥ ౧౧ ॥

హిరణ్యగర్భః శిశిరః తపనో భాస్కరో రవిః ।
అగ్నిగర్భోఽదితేః పుత్రః శంఖః శిశిరనాశనః ॥ ౧౨ ॥

వ్యోమనాథస్తమోభేదీ ఋగ్యజుస్సామపారగః ।
ఘనవృష్టిరపాం మిత్రః వింధ్యవీథీప్లవంగమః ॥ ౧౩ ॥

ఆతపీ మండలీ మృత్యుః పింగళః సర్వతాపనః ।
కవిర్విశ్వో మహాతేజా రక్తః సర్వభవోద్భవః ॥ ౧౪ ॥

నక్షత్రగ్రహతారాణాం అధిపో విశ్వభావనః ।
తేజసామపి తేజస్వీ ద్వాదశాత్మన్ నమోఽస్తు తే ॥ ౧౫ ॥

నమః పూర్వాయ గిరయే పశ్చిమాయాద్రయే నమః ।
జ్యోతిర్గణానాం పతయే దినాఽధిపతయే నమః ॥ ౧౬ ॥

జయాయ జయభద్రాయ హర్యశ్వాయ నమో నమః ।
నమో నమః సహస్రాంశో ఆదిత్యాయ నమో నమః ॥ ౧౭ ॥

నమ ఉగ్రాయ వీరాయ సారంగాయ నమో నమః ।
నమః పద్మప్రబోధాయ మార్తండాయ నమో నమః ॥ ౧౮ ॥

బ్రహ్మేశానాఽచ్యుతేశాయ సూర్యాయాఽదిత్యవర్చసే ।
భాస్వతే సర్వభక్షాయ రౌద్రాయ వపుషే నమః ॥ ౧౯ ॥

తమోఘ్నాయ హిమఘ్నాయ శత్రుఘ్నాయాఽమితాత్మనే ।
కృతఘ్నఘ్నాయ దేవాయ జ్యోతిషాం పతయే నమః ॥ ౨౦ ॥

తప్తచామీకరాఽభాయ వహ్నయే విశ్వకర్మణే ।
నమస్తమోఽభినిఘ్నాయ రుచయే లోకసాక్షిణే ॥ ౨౧ ॥

నాశయత్యేష వై భూతం తదేవ సృజతి ప్రభుః ।
పాయత్యేష తపత్యేష వర్షత్యేష గభస్తిభిః ॥ ౨౨ ॥

ఏష సుప్తేషు జాగర్తి భూతేషు పరిణిష్ఠితః ।
ఏష చైవాగ్నిహోత్రం చ ఫలం చైవాఽగ్నిహోత్రిణామ్ ॥ ౨౩ ॥

వేదాశ్చ క్రతవశ్చైవ క్రతూనాం ఫలమేవ చ ।
యాని కృత్యాని లోకేషు సర్వ ఏష రవిః ప్రభుః ॥ ౨౪ ॥

ఏనమాపత్సు కృచ్ఛ్రేషు కాంతారేషు భయేషు చ ।
కీర్తయన్ పురుషః కశ్చిత్ నాఽవసీదతి రాఘవ ॥ ౨౫ ॥

పూజయస్వైనమేకాగ్రో దేవదేవం జగత్పతిమ్ ।
ఏతత్త్రిగుణితం జప్త్వా యుద్ధేషు విజయిష్యసి ॥ ౨౬ ॥

అస్మిన్ క్షణే మహాబాహో రావణం త్వం వధిష్యసి ।
ఏవముక్త్వా తదాఽగస్త్యో జగామ చ యథాగతమ్ ॥ ౨౭ ॥

ఏతచ్ఛ్రుత్వా మహాతేజా నష్టశోకోఽభవత్తదా ।
ధారయామాస సుప్రీతో రాఘవః ప్రయతాఽత్మవాన్ ॥ ౨౮ ॥

ఆదిత్యం ప్రేక్ష్య జప్త్వా తు పరం హర్షమవాప్తవాన్‌ ।
త్రిరాచమ్య శుచిర్భూత్వా ధనురాదాయ వీర్యవాన్ ॥ ౨౯ ॥

రావణం ప్రేక్ష్య హృష్టాత్మా యుద్ధాయ సముపాగమత్ ।
సర్వయత్నేన మహతా వధే తస్య ధృతోఽభవత్ ॥ ౩౦ ॥

అథ రవిరవదన్ నిరీక్ష్య రామం ముదితమనాః ।
పరమం ప్రహృష్యమాణః నిశిచరపతి సంక్షయం విదిత్వా ।
సురగణమధ్యగతో వచస్త్వరేతి ॥ ౩౧ ॥