నారాయణ కవచం

(రాజోవాచ)
యయా గుప్తః సహస్రాక్షః సవాహాన్ రిపుసైనికాన్ ।
క్రీడన్నివ వినిర్జిత్య త్రిలోక్యా బుభుజే శ్రియమ్‌ ॥ ౦౧ ॥

భగవంస్తన్మమాఖ్యాహి వర్మ నారాయణాత్మకమ్‌ ।
యథాఽతతాయినః శత్రూన్ యేన గుప్తోఽజయన్మృధే ॥ ౦౨ ॥

(శ్రీశుక ఉవాచ)
వృతః పురోహితస్త్వాష్ట్రః మహేంద్రాయానుపృచ్ఛతే ।
నారాయణాఖ్యం వర్మాహ తదిహైకమనాః శృణు ॥ ౦౩ ॥

(విశ్వరూప ఉవాచ)
ధౌతాఙ్ఘ్రిపాణిరాచమ్య సపవిత్ర ఉదఙ్ముఖః ।
కృతస్వాంగకరణ్యాసో మంత్రాభ్యాం వాగ్యతః శుచిః ॥ ౦౪ ॥

నారాయణమయం వర్మ సన్నహ్యేత్ భయ ఆగతే ।
పాదయోర్జానునోరూర్వోః ఉదరే హృద్యథోరసి ॥ ౦౫ ॥

ముఖే శిరస్యానుపూర్వ్యాద్ ఓంకారాదీని విన్యసేత్ ।
ఓం నమో నారాయణాయేతి విపర్యయమథాపి వా ॥ ౦౬ ॥

కరన్యాసం తతః కుర్యాత్ ద్వాదశాక్షర విద్యయా ।
ప్రణవాదియకారాంతమ్‌ అంగుళ్యంగుష్ఠ పర్వసు ॥ ౦౭ ॥

న్యసేద్ధృదయ ఓంకారమ్‌ వికారం అనుమూర్ధని ।
షకారంతు భ్రువోర్మధ్యే ణకారం శిఖయా దిశేత్ ॥ ౦౮ ॥

వేకారం నేత్రయోర్యుంజ్యాత్ నకారం సర్వసంధిషు ।
మకారమస్త్రముద్దిశ్య మంత్రమూర్తిర్భవేద్ బుధః ॥ ౦౯ ॥

సవిసర్గం ఫడంతం తత్ సర్వదిక్షు వినిర్దిశేత్ ।
ఓం విష్ణవే నమః ఇతి ॥ ౧౦ ॥

ఆత్మానం పరమం ధ్యాయేత్ ధ్యేయం షట్ శక్తిభిర్యుతమ్‌ ।
విద్యాతేజస్తపోమూర్తిమ్ ఇమం మంత్రం ఉదాహరేత్ ॥ ౧౧ ॥

ఓం హరిః విధద్యాత్ మమ సర్వరక్షాం
న్యస్తాఙ్ఘ్రిపద్మః పతగేంద్రపృష్ఠే ।
దరారి చర్మాసి గదేషు చాప
పాశాన్ దధానోఽష్ట గుణోఽష్టబాహుః ॥ ౧౨ ॥

జలేషు మాం రక్షతు మత్స్యమూర్తిః
యాదోగణేభ్యో వరుణస్య పాశాత్ ।
స్థలేషు మాయావటు వామనోఽవ్యాత్
త్రివిక్రమః ఖేఽవతు విశ్వరూపః ॥ ౧౩ ॥

దుర్గేష్వటవ్యాజిముఖాదిషు ప్రభుః
పాయాన్ నృసింహోఽసురయూథపారిః ।
విముంచతో యస్య మహాట్టహాసం
దిశో వినేదుర్న్యపతంశ్చ గర్భాః ॥ ౧౪ ॥

రక్షత్వసౌ మాధ్వని యజ్ఞకల్పః
స్వదంష్ట్రయోన్నీతధరో వరాహః ।
రామోఽద్రికూటేష్వథ విప్రవాసే
సలక్ష్మణోఽవ్యాత్ భరతాగ్రజోఽస్మాన్ ॥ ౧౫ ॥

మాం ఉగ్రధర్మాద్ అఖిలాత్ ప్రమాదాత్
నారాయణః పాతు నరశ్చ హాసాత్ ।
దత్తస్తథా యోగాద్ అథ యోగనాథః
పాయాద్ గుణేశః కపిలః కర్మబంధాత్ ॥ ౧౬ ॥

సనత్కుమారోఽవతు కామదేవాత్
హయశీర్షా మాం పథి దేవహేలనాత్ ।
దేవర్షివర్యః పురుషార్చనాంతరాత్
కూర్మో హరిర్మాం నిరయాద్ అశేషాత్ ॥ ౧౭ ॥

ధన్వంతరిః భగవాన్ పాత్వపథ్యాత్
ద్వంద్వాద్ భయాద్ ఋషభో నిర్జితాత్మా ।
యజ్ఞశ్చ లోకాద్ అవతాజ్జనాంతాత్
బలో గణాత్ క్రోధవశాద్ అహీంద్రః ॥ ౧౮ ॥

ద్వైపాయనో భగవాన్ అప్రబోధాత్
బుద్ధస్తు పాషండగణాత్ ప్రమాదాత్ ।
కల్కిః కలేః కాలమలాత్ ప్రపాతు
ధర్మావనాయోరు కృతావతారః ॥ ౧౯ ॥

మాం కేశవో గదయా ప్రాతరవ్యాత్
గోవింద ఆసంగవం ఆత్తవేణుః ।
నారాయణః ప్రాహ్ణ ఉదాత్తశక్తిః
మధ్యందినే విష్ణురరీంద్రపాణిః ॥ ౨౦ ॥

దేవోఽపరాహ్నే మధుహోగ్రధన్వా
సాయం త్రిధామావతు మాధవో మామ్ ।
దోషే హృషీకేశ ఉతార్ధరాత్రే
నిశీథ ఏకోఽవతు పద్మనాభః ॥ ౨౧ ॥

శ్రీవత్సధామాఽపరరాత్ర ఈశః
ప్రత్యూష ఈశోఽసిధరో జనార్దనః ।
దామోదరోఽవ్యాదనుసన్ధ్యం ప్రభాతే
విశ్వేశ్వరో భగవాన్ కాలమూర్తిః ॥ ౨౨ ॥

చక్రం యుగాంతానల తిగ్మనేమి
భ్రమత్ సమంతాత్ భగవత్ ప్రయుక్తమ్ ।
దన్దగ్ధి దన్దగ్ధ్యరిసైన్యమాశు
కక్షం యథా వాతసఖో హుతాశః ॥ ౨౩ ॥

గదేఽశని స్పర్శన విస్ఫులింగే
నిష్పిండ నిష్పిండ్యజిత ప్రియాసి ।
కూష్మాండ వైనాయక యక్ష రక్షో
భూత గ్రహాంశ్చూర్ణయ చూర్ణయారీన్ ॥ ౨౪ ॥

త్వం యాతుధాన ప్రమథ ప్రేతమాతృ
పిశాచ విప్రగ్రహ ఘోరదృష్టీన్ ।
దరేంద్ర విద్రావయ కృష్ణ పూరితో
భీమస్వనోఽరేర్ హృదయాని కంపయన్ ॥ ౨౫ ॥

త్వం తిగ్మధారాసి వరారిసైన్యం
ఈశప్రయుక్తో మమ ఛింధి ఛింధి ।
చక్షూంషి చర్మన్ శతచంద్ర ఛాదయ
ద్విషామఘోనాం హర పాపచక్షుషామ్ ॥ ౨౬ ॥

యన్నోభయం గ్రహేభ్యోఽభూత్ కేతుభ్యో నృభ్య ఏవ చ ।
సరిసృపేభ్యో దంష్ట్రిభ్యో భూతేభ్యోఽంహోభ్య ఏవ వా ॥ ౨౭ ॥

సర్వాణ్యేతాని భగవన్ నామరూపాస్త్రకీర్తనాత్ ।
ప్రయాంతు సంక్షయం సద్యో యే నః శ్రేయః ప్రతీపకాః ॥ ౨౮ ॥

గరుడో భగవాన్ స్తోత్ర స్తోభశ్ఛందోమయః ప్రభుః ।
రక్షత్వశేష కృచ్ఛ్రేభ్యో విష్వక్సేనః స్వనామభిః ॥ ౨౯ ॥

సర్వాపద్భ్యో హరేర్నామ రూప యానాయుధాని నః ।
బుద్ధీంద్రియ మనః ప్రాణాన్ పాంతు పార్షద భూషణాః ॥ ౩౦ ॥

యథా హి భగవానేవ వస్తుతః సదసచ్చ యత్ ।
సత్యేనానేన నః సర్వే యాంతు నాశం ఉపద్రవాః ॥ ౩౧ ॥

యథైకాత్మ్యానుభావానాం వికల్పరహితః స్వయం ।
భూషణాయుధ లింగాఖ్యా ధత్తే శక్తీః స్వమాయయా ॥ ౩౨ ॥

తేనైవ సత్యమానేన సర్వజ్ఞో భగవాన్ హరిః ।
పాతు సర్వైః స్వరూపైర్నః సదా సర్వత్ర సర్వగః ॥ ౩౩ ॥

విదిక్షు దిక్షూర్ధ్వమధః సమంతాత్
అంతర్బహిర్భగవాన్ నారసింహః ।
ప్రహాపయన్ లోకభయం స్వనేన
స్వతేజసా గ్రస్త సమస్తతేజాః ॥ ౩౪ ॥

మఘవన్నిదం ఆఖ్యాతం
వర్మ నారాయణాత్మకమ్ ।
విజేష్యస్యంజసా యేన
దంశితోఽసురయూథపాన్ ॥ ౩౫ ॥

ఏతద్ధారయమాణస్తు యం యం పశ్యతి చక్షుషా ।
పదా వా సంస్పృశేత్ సద్యః సాధ్వసాత్ స విముచ్యతే ॥ ౩౬ ॥

న కుతశ్చిద్భయం తస్య విద్యాం ధారయతో భవేత్ ।
రాజదస్యుగ్రహాదిభ్యో వ్యాఘ్రాదిభ్యశ్చ కర్హిచిత్ ॥ ౩౭ ॥

ఇమాం విద్యాం పురా కశ్చిత్ కౌశికో ధారయన్ ద్విజః ।
యోగధారణయా స్వాంగం జహౌ స మరుధన్వని ॥ ౩౮ ॥

తస్యోపరి విమానేన గంధర్వపతిరేకదా ।
యయౌ చిత్రరథః స్త్రీభిః వృతో యత్ర ద్విజక్షయః ॥ ౩౯ ॥

గగనాన్యపతత్ సద్యః సవిమానో హ్యవాక్శిరాః।
స వాలఖిల్యవచనాత్ అస్థీన్యాదాయ విస్మితః ॥ ౪౦ ॥

ప్రాస్య ప్రాచీ సరస్వత్యాం స్నాత్వా ధామ స్వమన్వగాత్ ॥ ౪౧ ॥

(శ్రీశుక ఉవాచ)
య ఇదం శృణుయాత్ కాలే యో ధారయతి చాదృతః ।
తం నమస్యంతి భూతాని ముచ్యతే సర్వతో భయాత్ ॥ ౪౨ ॥

ఏతాం విద్యాం అధిగతో విశ్వరూపాత్ శతక్రతుః ।
త్రైలోక్యలక్ష్మీం బుభుజే వినిర్జిత్య మృధేఽసురాన్ ॥ ౪౩ ॥

ఇతి శ్రీమద్భాగవతే మహాపురాణే
పారమహంస్యాం సంహితాయాం ।
షష్ఠ స్కంధే నారాయణవర్మకథనం నామ
అష్టమోఽధ్యాయః ॥